謝謝”都市日報專訪-無私奉獻 馬浚偉”的報導!
https://www.metrodaily.hk/metro_news/無私奉獻-馬浚偉/

有人還記得嗎？其實馬浚偉於93年的《第3屆先鋒歌唱比賽》，以冠軍姿態殺入樂壇，還推出過多張大碟，至後期於劇界愈做愈出色，他才專心朝演員事業發展，成為無綫當家小生。不過離巢後，馬浚偉自組工作室及製作公司，更踏足舞台劇、電影的台前幕後，兜兜轉轉之下，本月又回歸最初的歌手身份，在香港演藝學院舉行入行26年來第一個個人演唱會！「真心講，大家唔好期望太多，我唔會好似郭富城、草蜢咁犀利，但喺呢兩個鐘，我會將自己嘅人生經歷、堅持同動力，透過音樂毫不保留地同大家分享。」馬浚偉謙虛地說。而更重要的是，他希望今次將一切“Down to earth”，在動盪的社會中用最真誠的心溫暖每個觀眾。

撰文：黎寶倫｜攝影：陸羽勝｜場地：i-club hotel
髮型：Frankie Tang｜化妝：李紫君@Yannie’s Makeup

「我哋去年已經籌備呢個演唱會，成個Concept好早已經諗咗，希望大家可以嚟溫暖同洗滌心靈，尤其近幾個月睇到社會動盪、市民唔開心，我就更加認為自己冇諗錯，我同團隊講全部嘢都要Down to earth，任何嘢都唔要有距離，我要Comfort到每場觀眾個心，希望佢哋唔係畀錢入嚟淨係睇馬浚偉喺度唱歌、炫耀啲衫有幾靚幾華麗，而係呢兩個幾鐘，我可以令佢哋內心好舒服，忘記好多依家嘅壓力。」將於本月24至27日、11月1至3日假香港演藝學院香港賽馬會演藝劇院，舉行處男騷《Dream Big馬浚偉演唱會2019》的馬浚偉（馬仔）說。
於是捨棄了一般的大型場地，馬仔特意挑選僅容納600人的劇院，去進行一個高互動和凝聚力的個唱，「可能呢3、5年都製作好多舞台劇，我愈嚟愈享受好Close嘅騷，你會Feel到觀眾嘅反應，佢哋嘅呼吸、笑聲、眼淚都感受到，嗰種力量好大，亦係社會嚟緊想要多啲近距離嘅接觸……」
懂得放負
面對持續多月的抗爭運動，不少市民皆身心俱疲，甚至情緒受困。曾飽受抑鬱症之苦長達8年的馬仔，如今則表示有信心能慰藉觀眾心靈，「近排好多朋友都受情緒困擾，我都經常勸佢哋畀自己唔開心，但要懂得放低，唔好一日24小時都畀唔開心充斥，否則好易出事，所以我會喺呢7場演唱會Cheer Up大家，End Up你一定會好溫暖地開心，亦都記得原本最開心同善良嗰個自己，因為我入行26年，有好多歌譬如《壹號皇庭》、《妙手仁心》、《勇往直前》等劇集歌曲，都陪住好多人成長，佢哋聽番都會記得『我細個聽㗎呢隻』！」
談到患病期間靠工作、酒精麻醉自己，最終在資深電影人陳佩華帶領下歸信基督，令他走出抑鬱陰霾，「每個人生活本身都有壓力，稍一不慎處理得唔好，再畀社會嘅負能量影響，好易變抑鬱症，我自己都會受影響，不過我會消化完，再透過禱告交畀天父，唔會留喺心裏面。如果知道自己情緒就爆煲，真係停一停唔好睇，我哋關心，但唔好跟咁貼。」
回饋社會
基層出身的馬仔，童年時一家7口住在百多、2百呎的深水埗屋邨內，中三開始邊兼職邊讀書，中學畢業便全身投入社會，賺錢養家，因此他深明弱勢社群與年輕人的苦況，多年來也不遺餘力做慈善，「我依家做嘅嘢，總之唔會淨係為自己！演藝嘅嘢固然要努力，但往後嘅事業，我諗我會做好自己嘅NGO，可能自己係屋邨長大，真係捱過，成日覺得到今日一切都叫唔錯嘞，最後所有嘢攞唔走嘅，我賺到錢唔會買啲咩㗎，寧願再開Project、再開更多Headcount請人。我都奉勸朋友唔好淨係掛住自己，特別依家我哋呢啲Middle Age，大家都有責任重建番香港，咁都要幫助多啲後生仔，製造多啲機會畀佢哋，所以最近個個嗌移民，我話我一定唔走！因為，如果真係錫呢個地方，我更加想喺呢度做多啲嘢。」故是次他於演唱會中，亦特設一個環節「追夢在舞台」，每晚約10分鐘的時間，給予素人分享故事與表演的機會。