馬浚偉昨日為長者安居協會在旺角鬧市賣旗籌款，雖然時近中午烈日當空，不過馬仔暴曬成句鐘依然笑容十足，還邊賣旗邊與市民合照，現場有如小型粉絲聚會，好不熱鬧。

馬仔接受「香港開電視」訪問時稱，好開心見到香港人依然有愛心、依然肯主動買旗，對於近期的社會紛爭，馬仔承認本身心情是有受到影響，亦會感到不開心，不過他感恩有自己的信仰，會將負面情緒交託給神，然後繼續充滿正能量同開開心心地生活。

馬仔坦言：「我唔希望唔開心、憤怒、仇恨經過馬浚偉傳出去，所以我有個行動做緊，就係每日都會同在街上遇到的人笑一笑，如果有眼神接觸的，我仲會講聲hello，如果大家覺得我傻或者烚熟既，咁你咪當我烚熟囉，至緊要大家開心，如果大家覺得咁做係可行既，都可以照做架！」

說到１０月尾舉行演唱會，馬仔稱正如火如荼籌備中，並透露說：「演唱會將橫跨我正日生日，當晚我已請左我最愛的女神周慧敏來做我嘉賓，另外亦會請我好欣賞的年青歌手，如釗峰、余香凝等出席。」

而最特別的是馬仔每場演唱會都有１個環節畀有天份的基層市民表演，馬仔稱：「好似有個老人家跳舞好叻、又有個彈琴好叻，我希望帶出個訊息係，即使係基層市民，都可以有佢地既舞台，我唔介意分享自己的舞台出來畀佢地發揮！」